المساعد الشخصي الرقمي

مشاهدة نسخة كاملة : نظام الإشعال التقليدى فى محركات السيارات


samirayad
07-05-2013, 09:06 PM
لابد من توافر نظام لتوليد الشراره الازمه لأشتعال مخلوط الهواء والبنزين

بمعنى أصح إحنا عندنا البنزين والهواء .....

عاوزين بأه الكبريت اللى حيولعلنا الحاجات دى ويولد طاقه حراريه

هو ده دور نظام الأشعال فى محركات البنزين

إذا

_ ماهى وظيفة نظام الأشعال فى محركات الأشعال بالشراره

1- توليد التيار الكهربى بجهد عالى لأحداث شراره قويه بين ثغرة البوجيهات ( دور البوبينا )

2- تنظيم وقت أصدار الشراره ( عملية تقديم أو تأخير الشراره ) حسب ظروف التشغيل

( جهاز التحكم فى وقت الشراره ....اللى بيقولوا عليه الأفانس فى المحركات التقليديه )

3- توزيع الشراره على أسطوانات المحرك ( دور الأسبراتير )

حندردش شويه الأول عن نظام الأشعال التقليدى

مكوناته

1- البطاريه

2- مفتاح الأشعال .....الكونتاكت

3-ملف الأشعال ......البوبينا

4- موزع الشرر ....الأسبراتير

5- قاطع التلامس ....الأبلاتين

6- المكثف

7- شمعات الأشتعال .......البوجيهات ( سيتم التحدث عنها فيما بعد )

رقم 1& 2 معروف نظامهم .....ولا داعى للخوض فيهم الآن

3- ملف الأشعال ....البوبينا

عباره عن محول كهربى ....يقوم بتحويل جهد البطاريه المنخفض (12 فولت )

الى الجهد العالى الازم للأشعال ...

وتتراوح عملية رفع الفولت داخل البوبينا من 15 - 25 ألف فولت كهربى

يتكون ملف الإشعال من رقائق من الحديد المطاوع ( القابل للمغنطه المؤقته ) ....

حيث يتم لف ملفات الملف الثانوى للبوبينا ذو المقطع الدقيق للغايه حول هذا القلب ....

وتكون ملفات الملف الثانوى مصنوعه من النحاس المعزول بماده عازله مناسبه

لتحمل درجات الحراره الناتجه من مرور التيار العالى فى الشده داخل ملفات الملف الثانوى

فوق الملف الثانوى يقع الملف الأبتدائى ذو عدد اللفات القليله ومقطع السلك الكبير

حيث يصنع من سلك نحاسى أيضا ذو قطر أو مقطع أكبر

يوجد بداخل بعض ملفات الأشعال (البوبينا ) زيت بهدف تبريد الكويل بسبب تأثير الحراره

الغير مرغوب فيها على ملفات الكويل .... لأن مرور التيار يولد حراره غير مرغوبه ..

.تؤثر على العزل الكهربى للملفات

أذا الحراره مش كويسه على البوبينا ....

علشان كده بنلاحظ أن أكتر حاجه بتؤثر على آداء البوبينا هى الحراره

علشان كده بنحط فوطه مبلوله على البوبينا .....علشان نعرف العيب منها ولا لا ..
..
لما بنلاقى صعوبه فى الدواره والمكنه ساخنه

لأن معروف أن السخونه بترفع مقاومة الموصلات أو الملفات بصفه خاصه....

ممايعنى مقاومه أكبر لمرور التيار ( حسب قانون أوم الكهربى )

http://i728.photobucket.com/albums/ww287/samirayad/ignition-system-coil.gif

بعاليه صوره للبوبينا لوحدها

والمخطط التالى لدايرة أشعال تقليديه كامله بجميع المكونات ....

وباين فيها موقع البوبينا فى الدايره ( القطعه رقم 3 على المخطط بتمثل البوبينا )


http://i728.photobucket.com/albums/ww287/samirayad/untitled-76.jpg


-----------------------------------


4- موزع الشرر..............الأسبراتير

موزع الشرر بيستلم الفولت العالى بعد أنتاجه فى البوبينا علشان يوزعه على البوجيهات

حسب تقسيمة عمود الكامه ....وحسب ترتيب الحريق بالمحرك

لأنه بيتم تدوير موزع الشرر من خلال أتصاله بترس صغير على عمود الكامه

- وظيفة موزع الشرر

1-فتح وقفل الدايره الكهربيه بين البطاريه والبوبينا من خلال قاطع التلامس ( الأبلاتين )

حنعرف ده بيتم أزاى مع شرح الأبلاتين والمكثف

2- توزيع تيار الجهد العالى بعد أنتاجه فى البوبينا على أسطوانات المحرك وذلك بتشغيل البوجيهات ......

من خلال وش الأسبراتير وشاكوش الأسبراتير

3-تنظيم توقيت أرسال الفولت العالى ...الازم لتوليد الشراره

أى عملية التقديم والتأخير فى زمن أرسال الفولت من خلال جهاز التحكم فى زمن الأرسال ......

اللى بيقولوا عليه الأفانس

مع ملاحظة أن جهاز التحكم فى وقت الشراره بيعمل من خلال خط فاكيوم قادم من تحت باب الكربوراتير

لتحديد الوقت الازم لأرسال الشراره أعتمادا على حمل وسرعة المكنه

موزع الشرر بجميع مكوناته هو القطعه رقم (4) على الرسم السابق


------------------------------------

أستكمالا لموضوع الأسبراتير

فأن عملية توزيع الشراره على أسطوانات المحرك

وكذلك فأن عملية تنظيم وقت أرسال تيار الجهد العالى الى البوجيهات

وكذلك عملية الفتح والغلق للأبلاتين لتقطيع جهد البطاريه ( حنتكلم عنها بأستفاضه فيما بعد ).................

كل الأمور دى بتتم داخل الأسبراتير

وتلك صوره كامله لجميع محتويات الأسبراتير

http://i728.photobucket.com/albums/ww287/samirayad/untitled-75.jpg

مع ملاحظة أن الأعتماد على عملية تقطيع الفولت القادم من البطاريه قبل أرساله

بغرض التكبير داخل البوبينا بتتم داخل الأسبراتير

كما أن عملية توزيع الفولت الازم للشراره والمرسل الى البوجيهات من خرج وش الأسبراتير

بتعتمد على العمود الدوار للأسبراتير والعضو المسئول عن التلاحم حسب توقيت الحريق

ألا وهو شاكوش الأسبراتير .....لحظة ألتقائه مع غطاء أو وش الأسبراتير


----------------------------------------


5- قاطع التلامس .......الأبلاتين

يقوم قاطع التلامس بدور أساسى وهام جدا فى دورة الأشعال

فهو يقوم بتقطيع جهد البطاريه الصغير ( 12 فولت )

وذلك لزوم عمل الدائره الأبتدائيه فى البوبينا ......لكى تستطيع البوبينا ( بصفتها كمحول رفع كهربى )

من أنتاج فولت كهربى عالى الشده فى الملف الثانوى للبوبينا

طيب ليه ......دور الأبلاتين مهم .......ولابد من وجوده

وحينما يقفل أطراف التلامس بتاعته على بعض ....اللى بنقول عليها ( الأبلاتين لدع )

العربيه بتبطل على طول

فى نظرية عمل المحولات الكهربيه ......

لايمكن تحويل التيار من جهد منخفض الى جهد عالى ...الا حينما يكون التيار متغير الموجه ....

.أى أن التيار والفولت مفيش بينهما أتحاد فى الأتجاه

علشان كده بنلاقى منحنى الخصائص بين الفولت والأمبير فى التيار المتغير ( منحنى جيبى )......

عامل زى أهرام طالعه ونازله على منحنى الخصائص

علشان كده بنلاقى فى التيار المستمر ( زى البطاريه )

التيار والفولت ماشين مع بعض وعلى أستقامه واحده فى نفس الأتجاه

على منحنى خصائص التيار المستمر

علشان الحته دى ......أحنا محتاجين الأبلاتين ....

علشان نقطع التيار زى الشرائح كده .....علشان نبوظ شكل الثبات والأنتظام بتاعه مع الفولت ......

يعنى بنفشكل الأنتظام بينهما

بنحاول نحولهم الى صورة التيار المتغير الى حد ما

علشان البوبينا تشتغل

وده شكل قطاع أفقى على محور الأسبراتير لأيضاح الشكل العام للأبلاتين


http://i728.photobucket.com/albums/ww287/samirayad/untitled-77.jpg


فى الشكل أحنا شايفين كامات التقطيع ( حدبات القطع ) علشان تزق السناده....

وبكده بيتم فتح وقفل نقاط التلامس للأبلاتين مع دوران العمود الدوار للموزع ( الأسبراتير)

وطبعا معروف ....معنى أن الأبلاتين لدع ....يعنى أطراف التلامس لحموا مع بعض

يعنى مفيش تقطيع شراره ....يعنى البوبينا عطلت ....يعنى العربيه مش حدور

وده ليه سبب برضه حنقوله مع شرح المكثف condenser (الكوندنسر )


-----------------------------

حنتكلم الأول عن دور المكثف فى دورة الأشعال التقليديه

- يتكون المكثف من مجموعة شرائح (رقائق )أو ألواح معدنيه

بينها شرائح معزوله


أنظر الشكل التالى


http://i728.photobucket.com/albums/ww287/samirayad/untitled-78.jpg

- معروف أن المكثفات عامة ( وواضحه من الأسم ) تقوم بتكثيف أو تخزين الطاقه الكهربيه

للأستفاده منها فى لحظات نقصان الطاقه فى الدواير الكهربيه

حيث يقوم المكثف بأكتساب وتخزين الطاقه الكهربيه وتكون طاقه داخله اليه فى أتجاه معين

( أتجاه دخول للمكثف )

وفى لحظه أخرى تفقد عندها الطاقه يقوم المكثف بدفع الطاقه المختزنه داخله فى الأتجاه المعاكس

(خروج طاقه من المكثف )

فوائد المكثف فى دورة الأشعال العاديه

- يعمل على زيادة القدره الكهربيه الدافعه المستنتجه داخل الملف الثانوى للبوبينا

والذاهبه الى الأسبراتير لتوزيعها على البوجيهات ( لزوم شراره قويه )

- فعند قطع دائرة الملف الأبتدائى بين البطاريه وملف البوبينا الأبتدائى ( بواسطة الأبلاتين )

يحدث تفريغ للطاقه الكهربيه المختزنه فى المكثف فى عكس أتجاه التيار الأصلى

وهذا يؤدى الى سرعة أنهيار وتلاشى المجال المغناطيسى الناتج من مرور التيار

من البطاريه الى الملف الأبتدائى للبوبينا

يعنى للأسراع بتقطيع التيار بين البطاريه والبوبينا

- يقوم المكثف بحماية نقاط التلامس للأبلاتين من التلف واللدعان

( بيخللى الطرفان بتوع التلامس ميتلحموش ببعض )

وذلك بسبب التيار والحريق الناتج فى تلك المنطقه بسبب التيار الكهربى

مما يساعد على أنتظام عملية تقطيع التيار بواسطة الأبلاتين والحفاظ على أنتاج جيد

للفولت العالى الخارج من الملف الثانوى للبوبينا

بيمتص التيار لحظة هجومه على الأبلاتين ....ويقوم بتفريغ التيار لحظة مفارقته للأبلاتين ....
..
من الآخر عاوزين نقول أن المكثف هو الحارس الأمين على عمل الأبلاتين

---------------------------------

دى فكره مبسطه عن مايتم فى دورة الإشعال التقليديه

نتكلم شويه خفاف عن نظام الأشعال الألكترونى فى السيارات الحديثه

- نظرا للعيوب التى نواجهها فى أستعمال نظام الأشعال التقليدى

لجأ العلماء الى أستعمال نظام أشعال أكثر تحملا وكفاءة فى الأداء

ألا وهو نظام الأشعال الألكترونى

فى المحركات الحديثه سريعة الدوران تم الأستغناء عن النظام التقليدى فى توليد الشراره

ولقد حلت أشباه الموصلات ( الدايودات والترانزيستورات )..........

محل قاطع التلامس والمكثف بما يسمى المشط الألكترونى

حيث هنا يتم تقطيع تيار البطاريه للملف الأبتدائى للبوبينا بطريقه الكترونيه

نظام ON/ OFF ....وبالتالى تمكين البوبينا من تحويل تيار البطاريه

المنخفض فى القيمه الى تيار عالى الجهد لكى نتمكن من الحصول على شراره قويه فى البوبينا

لازمه لدورة الأشعال

من مميزات نظام الأشعال الألكترونى

1-الحصول على جهد عالى لازم لتوليد شراره قويه حتى عند أٌقصى عدد لفات للمحرك

2- عمر أطول ....حيث لايوجد نقاط تلامس ( أبلاتين ) عرضه للتلف والحريق واللحام .....

اللى بنقول عليها لدعان الأبلاتين .....

3- لايحتاج صيانه ...لأنه يقوم على نظرية المفاتيح الألكترونيه داخل المشط الألكترونى

لا فيه صنفرة أبلاتين ولا غيره .

4- أعطال الأشعال الألكترونى تكون فى أضيق الحدود عن النظام التقليدى

حتى فى ظروف التشغيل الصعبه وخصوصا ظروف التشغيل فى الطقس البارد

وعند أذدحام الطرق وخلافه

samirayad
07-05-2013, 09:14 PM
سألنى أحد الأصدقاء سؤالا

كان عاوز يعرف الكهربه بتمشى أزاى فى دايرة الأشعال

رديت عليه قائلا

شوف ياسيدى ....حنتكلم على الرسمه البسيطه دى

http://i728.photobucket.com/albums/ww287/samirayad/untitled-76.jpg

1- مع قفل الكونتاكت 2 التيار حيمشى من البطاريه

الى ملف الأشعال 3 ( البوبينا يعنى )

2- التيار بتاع البطاريه أبو جهد كهربى (12 فولت ) حيمشى فى الملف الأبتدائى التخين ( الخارجى للبوبينا )

أبو لون أسود تقيل

3- لاحظ كده أن نهاية الملف الأبتدائى للبوبينا متصله بالملف الثانوى

( الرفيع الداخلى الخفيف ...اللى ملفوف من داخل الملف الأبتدائى )

ومتصل فى نفس الوقت عند النقطه 6 وبيتفرع الى نقط ألأتصال (الأبلاتين 6 ) ومنطقة المكثف 5

4- مع فتح وقفل نقط أتصال الأبلاتين ( زى كونتاكت برضه ) بيتم تقطيع التيار ده

وتشويه موجة سريان التيار مع الفولت ( زى ماقولنا )

وبالتالى بيتم عمل أنهيار للمجال المغناطيسى اللى حصل حول الملف الأبتدائى بسبب مرور تيار البطاريه ....

5- النظريه دى بأه اللى بتخللى عملية التحويل من جهد منخفض فى الملف الأبتدائى للبوبينا

مع حدوث تشوه للتيار والفولت

هى دى اللى بتخللى الملف الثانوى ( الرفيع ) يطلعلنا تيار كهربى عالى الجهد يطلع من نصف البوبينا

يعنى تحولت إلى محول رفع لقيمة الفولت الكهربى

6- بأه عندنا تيار عالى الجهد دلوقتى طالع من نصف البوبينا ورايح للأسبراتير 4

7- بيبقى رايح لنصف الأسبراتير عند مركز الشاكوش ونازل على الشاكوش

8- بص على خط التيار اللى ماشى على شمال الشاكوش كده

9- هو ده طرف التلامس مع وش الأسبراتير ( ومن داخل الوش ) أجزاء نحاسيه

متوزعه على محيطه من الداخل على حسب عدد أسطوانات المحرك

10- مع دوران الشاكوش ....بسبب أن عمود الأسبراتير بيدور بسبب ترسه السفلى اللى بيدور

بسبب ترس خاص على عمود الكامه

11- بيتم توزيع التيار ( عالى الجهد ) على مخارج الوش بتاع الأسبراتير حسب تقسيمة المكنه

( ومن الوش الى البوجيهات مرورا بوسيلة النقل ...(اللى هى كابلات البوجيهات )

طبعا فى الشكل الوش متقسم على 60 درجه ( لكل نقطة أتصال داخل الوش )

لأن دى دورة أشعال لمحرك 6 سلندر

فى المحركات الأربعه سلندر ( المنتشره معانا ) بيبقى الوش متقسم على 90 درجه

على أساس حيبقى فى الوش أربع نقاط للأتصال مع طرف الشاكوش ومع دورانه

( حسب تقسيمة المكنه )

أرجو أن يكون الشرح المبسط ده ......أدى الهدف المطلوب

samirayad
07-05-2013, 09:20 PM
واحد كان بيسألنى

يعنى أيه نعلى ونوطى الكهربه

وكان هذا هو تعليقى


حنحاول مع بعض نبسط سيناريو الأحداث اللى بتحصل بطريقة السؤال والجواب مع النفس

- يعنى أيه أسبراتير .........؟

يعنى موزع شرر ....بيخرج منه الفولت العالى بعد رفع قيمة فولت البطاريه فى البوبينا

ووش الأسبراتير بيدى لكل بوجيه نصيبه فى الوقت المناسب تماما للحصول على حريق جيد

- طيب بيوزع الشراره دى أزاى وأيه اللى بيتحكم فى شغله .....؟

بناء على التحكم فى زاوية دوران قلبه الدوار الحامل لشاكوش توزيع الفولت على النقط الأربعه بوش الأسبراتير

- طيب ده مرتبط بأيه ....؟

مرتبط بالعضو اللى بيدور قلب الأسبراتير ....أى بنهاية عمود الكامات

والكامات هى اللى بتحدد وقت وفتح الصبابات لأكمال دورة حريق المحرك

- طيب أيه العلاقه .......؟

مصمم أى محرك بيكون واضع خطه وتصميم معين بحيث من خلال تدوير قلب الأسبراتير

(بنهاية عامود الكامات )

يتم أرسال شراره الى البوجيهات فى وقت محسوب بدقه متناهيه

غالبا بيكون ...قبل النقطه الميته العليا لحركة البساتم بدرجه معينه لدوران عمود الكرنك

ومحسوبه مع عملية تقسيم وش التقسيمه (كرنك وكامه وخلافه )

- أيه اللى بيحصل بأه لما الميكانيكى بيحرك الأسبراتير كاملا سنه بسيطه فى أى أتجاه ....؟

لو الميكانيكى لف الأسبراتير فى أتجاه تقديم زمن أرسال الشراره للبوجيهات

(غالبا بيكون مع أتجاه عقارب الساعه )

ده بيعنى أننا بخللى الفولت العالى (اللى حيولد شراره بين قطبى البوجيه )

يعمل شراره بدرى شويه عن الوقت الأساسى اللى مصممه عليه دورة حريق المكنه

يعنى بيحصل حريق بدرى شويه فى كل غرفة حريق (حسب ترتيب الحريق )

أذا لو الميكانيكى زودها شويه ....المكنه حتسقف ...لأن حيحصل لخبطه فى عملية الحريق

وحتبقى دربكه داخل غرف حريق المحرك

غالبا بيقوم الصنايعيه باللجوء لعملية اللعب فى زاوية الأسبراتير لتلافى عيوب آداء موجوده بالمكنه

من أجل ضبط عملية الحريق

والعكس صحيح فى حالة تأخير زمن أطلاق الشراره (بلف الأسبراتير فى الأتجاه العكسى )

اى تأخير زمن إرسال الشراره من البوجيهات لحرق مخلوط الهواء والبنزين


وهو ده إللى بنسميه توطية الكهربه

mhamdy75
07-05-2013, 10:25 PM
:Smilies1 (53):ماشاء الله على المعلومات:Smilies1 (53):

samirayad
17-05-2013, 04:25 PM
فيديو توضيحى للكلام السابق

http://www.youtube.com/watch?NR=1&v=W94iksaQwUo&feature=endscreen (http://www.youtube.com/watch?v=W94iksaQwUo&feature=endscreen)

kimotiggo
17-05-2013, 07:33 PM
مرجع هام جدا..

شكرا يا هندسة :Smilies1 (53):